Gjirokastra të magjeps me rrugicat e pjerrëta gati përrallore, ku çdo ndërtesë e ka të shkruar në gur historinë e vet. E vendosur në Shqipërinë Jugore, Gjirokastra shtrihet në shpatet e pjerrëta të luginës së lumit Drino, në një pozicion mbisundues dhe një peizazh të pasur me histori.

Ky është “qyteti i një mijë shkallëve”, që përfshin qindra shtëpi – kullë të tipit otoman me çatitë e gurta, ballkonet e drunjta dhe muret e gurta, herë – herë të zbardhura me gëlqere. Me kalanë madhështore mbi një kodër të thepisur, Gjirokastra është qyteti magjik me një të shkuar të trazuar, që prej vitit 2005, është pjesë e pasurisë botërore të UNESCO-s.

Origjina e qytetit nis me kalanë e Gjirokastrës, e ndërtuar në shekullin IV pas Krishtit. Kalaja, e njohur si kalaja e Argjirosë është struktura më e rëndësishme e qytetit, dhe më e madhja në Shqipëri. Qyteti u quajt Argyrokastro në vitin 1336. Ai arriti kulmin e lulëzimit gjatë viteve 1800-1830, kur u ndërtuan shtëpitë karakteristike monumentale.

Në brendësi të kalasë mund të vizitoni Muzeun e Armëve, i hapur në vitin 1971. Aty gjenden të ekspozuara armë të ndryshme, që datojnë nga kohërat parahistorike deri në Luftën e Dytë Botërore. Në këtë kala zhvillohet prej shumë vitesh Festivali Folklorik Kombëtar i Gjirokastrës.

Lagjja e Pazarit dhe Lagjja Hazmurat ishin dy lagjet e para të qytetit. Karakteristika kryesore e Gjirokastrës është përdorimi intensiv i gurit në ndërtimin e shtëpive, që ngjajnë si kala të vogla, rrugët me kalldrëm, që të gjitha të çojnë në Pazar. Këtu mund të vizitoni edhe Xhaminë e Pazarit, e ndërtuar në vitin 1557. Zona historike është ajo pjesë e qytetit që tërheq më së shumti turistët. Në zbritje drejt “Sheshit të Çerçizit”, aty ku si me thikë ndahet e shkuara me të tashmen, udhëtimi drejt pasurive të pazbuluara të Gjirokastrës fillon nga rruga më e bukur e qytetit, ku motivet e qilimta të kalldrëmit nuk mund t’i shpëtojnë syrit të turistëve dhe përjetësimit në aparatet fotografikë.

Disa nga atraksionet në Qafën e Pazarit janë Sokaku i të Marrëve, shtëpia e rindërtuar e shkrimtarit të madh shqiptar Ismail Kadare, shtëpia e Zekatëve, e mbështetur në shpatin malor, shtëpia e Skëndulatëve.

Në Gjirokastër mund të vizitoni edhe destinacione të trashëgimisë kulturore dhe natyrore.

Parku arkeologjik i Antigonesë ndodhet pranë fshatit Saraqinisht në zonën e Lunxhërisë, në lindje të Gjirokastrës. Ky park është 14 km larg Gjirokastrës dhe është themeluar nga mbreti Pirro i Epirit në vitin 295 p.e.s. Në parkun arkeologjik Antigone ka shumë atraksione për t’u vizituar si: mozaiku, kolonat, shëtitorja, një peshore antike, muret rrethuese etj.

Në fshatin Labova e Kryqit, pranë qytetit të vogël të Libohovës, mund të vizitoni një nga kishat më të vjetra dhe më të bukura bizantine në Shqipëri, kushtuar Shën Mërisë. Kisha është ndërtuar në një stil të ngjashëm me Kishën e Shën Sofisë në Stamboll dhe mbetet një ndër atraksionet më të veçanta të qytetit të Gjirokastrës.

Përgjate turit tuaj në Gjirokastër mund të vizitoni edhe teatrin antik të Hadrianapolisit, i cili ndodhet pranë fshatit Sofratikë, rreth 14 km larg Gjirokastrës, përgjatë autostradës Gjirokastër – Kakavijë. Ky teatër daton që prej shekullit të II p.e.s dhe përfaqëson një prej atraksioneve më interesante arkeologjike.

Për të gjithë të apasionuarit e natyrës dhe sporteve të aventurës një mundësi shumë e mirë për t’u qetësuar pranë natyrës është Fusha e Çajupit, e cila shtrihet në zonën e Lunxherisë dhe është e rrethuar nga burime me ujë të ftohtë dhe pemë shumëngjyrëshe. Kjo zonë me potencial për zhvillimin e turizmit malor është ideale për hiking, shëtitje me kalë, meditim etj.

Qyteti i Gjirokastrës njihet edhe për artin e gatimit, ku mund të përmendim gatime të veçanta si pasha qofte, shapkat, oshaf me fiq të thatë (ëmbëlsirë me qumësht deleje, sheqer dhe fiq të thatë).

Për më shumë vizitoni:

Bashkia Gjirokastër