Qyteti i Vlorës është një nga qytetet më të bukur të Shqipërisë, ku ndërthuren bashkë kaltërsia e detit, bukuritë e natyrës me shpatet malore e shkëmbore të bregdetit të thyer të jugut të vendit.

E konsideruar si perlë e turizmit shqiptar, Vlora shtrihet buzë detit Adriatik dhe detit Jon, në jugperëndim të Shqipërisë, rreth 135 km larg Tiranës. Ajo kufizohet në veri me Fierin, në lindje me Mallakastrën dhe Tepelenën, ndërsa në jug me Sarandën dhe Gjirokastrën. Në lashtësi Vlora njihej me emrin Aulona, dhe përmendet nga shumë udhëtarë dhe kronikanë të huaj, si një nga qytetet – skelë kryesore të Ilirisë së Jugut, që lulëzoi pas rënies së Apollonisë dhe Orikut. Rëndësia e Vlorës u rrit edhe më tej teksa në këtë qytet u shpall Pavarësia e Shqipërisë, nga Perandoria osmane, më 1912.

Ndër atraksionet më të vizituara brenda qytetit janë Kompleksi historik Muzeal i Pavarësisë; tarraca detare e Teqesë së Kuzum Babait, e vendosur në një kodër mbi qytet, xhamia e Muradies, pranë bulevardit Vlorë -Skelë, në zonën arkeologjike pranë Sheshit të Flamurit; rruga e Hebrejve, etj.

Laguna e Nartës përfaqëson një nga lagunat më të mëdha e më të rëndësishme të Shqipërisë, e cila ndodhet në skajin jugor të Ultësirës bregdetare. Kjo lagunë bashkë me ishullin e Zvërnecit dhe Pyllin e Sodës gjenden pak kilometra larg qytetit të Vlorës, në pjesën veriperëndimore të tij dhe krijojnë një ansambël natyror mbresëlënës dhe unik. Këtu ndodhet Triporti një bukuri natyrore e paeksploruar nga vizitorët.

Interes të veçantë për vizitorët shfaq Manastiri i Shën Mërisë në ishullin e Zvërnecit, tek i cili mund të shkohet përmes një ure të ngushtë druri; Kalaja e Kaninës, në pjesën Juglindore të qytetit, nga e cila kundrohet gjiri i Vlorës, fusha bregdetare dhe lugina e poshtme e Shushicës. 

Brigjet e Vlorës janë kartolina magjepsëse e fillimit të rivierës shqiptare, që nis me zbritjen e Qafës së Llogarasë thikë mbi det dhe vijon me panoramën e magjishme të vijës së thyer të rivierës joniane, e cila krijon gjire, ishuj, gadishuj dhe plazhe të shumtë, njëri më përrallor se tjetri.

Disa nga destinacionet më të bukura të Vlorës, thesare të rivierës shqiptare janë: Gadishulli i Karaburunit, më i madhi në Shqipëri; ishulli i Sazanit; Parku antik i Orikut, Parku Arkeologjik i Amantias si dhe fshtarat e bukur bregdetarë e shpellat e pazbuluara buzë detit Jon, kalaja e Porto Palermos në Himarë.

Vlora është qyteti i dytë më i madh portual pas Durrësit, një qendër e rëndësishme tregtare dhe detare në Shqipëri.

Vlora është rrethi ku alternohen midis tyre të gjitha format e relievit, si ai i ulët fushor, kodrinor dhe malor. Dy nga vlerat e trashëgimisë kulturore që mbart rajoni i Vlorës janë edhe Polifonia Labe, e vlerësuar si pasuri e UNESCO -s, apo këngët qytetare vlonjate. Vlora për vlerat e shumta që mbart dhe falë vendndodhjes gjeografike vizitohet nga turistët gjatë gjithë vitit, duke ofruar disa lloje turizmi si atë kulturor, historik, malor, sportie, bregdetar, etj.

Vitet e fundit, Vlora ka patur një zhvillim të madh në aspektin turistik, pasi bukuritë e natyrës së saj zbulohen dita ditës teksa zhvillohen edhe hoteleritë, e restorantet e shumta pranë atraksioneve të larmishme dhe plazheve të bukura.

Vlora si destinacion për pushimet tuaja është zgjedhje inteligjente, pasi magjia e këtij qyteti të kaltër ta bën të vështirë kthimin në përditshmëri.

Për më shumë  vizitoni:

Bashkia Vlorë