NJOFTIM PËR VEND TË LIRË PUNE

Specialist në Sektorin Juridik, Burimeve Njerëzore dhe Prokurimeve pranë Drejtorisë së Financës dhe Shërbimeve Mbështetëse në Agjencinë Kombëtare të Turizmit (AKT),

 Në zbatim të: Ligjit nr. 7961, datë 12.07.1995 “Kodi i Punës i Republikës së Shqipërisë”, i ndryshuar; Ligjit nr. 44/2015 “Kodi i Procedurave Administrative i Republikës së Shqipërisë”; Ligjit nr. 90, datë 27.09.2012 “Për organizimin dhe funksionimin e administratës shtetërore”; VKM nr. 20, datë 18.01.2023 “Për një ndryshim në Vendimin nr. 298, datë 20.04.2016, për organizimin dhe funksionimin e Agjencisë Kombëtare të Turizmit; Urdhrit të Kryeministrit nr. 205, datë 05.11.2025 “Për miratimin e strukturës dhe të organikës së Agjencisë Kombëtare të Turizmit” (hyrje me tonën nr. 498/1 prot, datë 07.11.2025); Vendimit nr. 11, datë 15.01.2026 “Për disa ndryshime dhe shtesa në Vendimin nr. 191, datë 09.03.2016, të Këshillit të Ministrave, për krijimin e bazës së të dhënave shtetërore për sistemin e shërbimeve të punësimit”; Rregullores së Brendshme “Për organizimin dhe funksionimin e AKT-së”, njofton hapjen e 1 (një) vendi vakant për pozicionin: Specialist në Sektorin Juridik, Burimeve Njerëzore dhe Prokurimeve pranë Drejtorisë së Financës dhe Shërbimeve Mbështetëse në Agjencinë Kombëtare të Turizmit (AKT), Kategoria e pagës: IV-2.

I.  KUSHTET QË DUHET TË PLOTËSOJË KANDIDATI

A.  Kushtet e Përgjithshme

Kandidatët duhet të plotësojnë të gjitha kushtet e mëposhtme:

a.   Të ketë shtetësinë shqiptare;

b.   Të gëzojë zotësi të plotë për të vepruar;

c.   Të gëzojë integritet moral dhe profesional;

d.   Të jetë i aftë për punë;

e.   Të mos jetë dënuar me vendim gjykate të formës së prerë për kryerjen e një krimi apo kundërvajtjeje penale me dashje;

f.    Të mos i jetë hequr e drejta e ushtrimit të detyrës në administratën publike me vendim gjyqësor të formës së prerë;

g.   Të mos jetë larguar për shkelje disiplinore nga administrata publike dhe të mos ketë masë disiplinore të rëndë në fuqi sipas Kodit të Punës;

h.   Të mos ketë konflikt interesi me detyrën ose funksionin që do të kryejë.

B.  Kërkesat e Posaçme

Kandidatët duhet të plotësojnë gjithashtu kërkesat e mëposhtme të posaçme:

1.   Të ketë përfunduar studimet e larta në shkenca shoqërore;

2.   Të ketë aftësi të shkëlqyera komunikimi në të shkruar dhe të folur në gjuhën shqipe;

3.   Të jetë njohës i mirë i drejtëshkrimit të gjuhës shqipe;

4.   Të ketë aftësi organizative dhe të realizojë punën me efiçencë, efektivitet dhe brenda afateve;

5.   Të njohë dhe të zbatojë rregullat e etikës dhe sjelljes profesionale në administratën publike.

II.  PËRSHKRIMI I DETYRAVE DHE PËRGJEGJËSIVE

Specialisti/ja në Sektorin Juridik, Burimeve Njerëzore dhe Prokurimeve pranë Drejtorisë së Financës dhe Shërbimeve Mbështetëse në Agjencinë Kombëtare të Turizmit (AKT), kryen detyrat dhe mban përgjegjësitë e mëposhtme:

Detyrat dhe përgjegjësitë e Specialistit të Protokoll-Arkivës

1. Administron, regjistron dhe protokollon të gjithë korrespondencën zyrtare hyrëse dhe dalëse të AKT-së, duke garantuar regjistrimin e saktë dhe në kohë të dokumentacionit në regjistrat dhe sistemet përkatëse të protokollit.
2. Administron dhe mirëmban regjistrat e protokollit, duke siguruar evidentimin, klasifikimin, numërtimin dhe shpërndarjen e dokumentacionit sipas rregullave dhe procedurave ligjore në fuqi.
3. Kujdeset për përcjelljen në kohë të dokumentacionit pranë strukturave përkatëse të institucionit, sipas kompetencave dhe udhëzimeve të Drejtorit të Përgjithshëm apo eprorit të drejtpërdrejtë, si dhe ndjek administrimin e dokumentacionit të deleguar për trajtim.
4. Administron dhe sistemon dokumentacionin arkivor të institucionit, duke kryer klasifikimin, inventarizimin, sistemimin, ruajtjen dhe përgatitjen e dokumentacionit për dorëzim në arkiv, në përputhje me legjislacionin në fuqi për arkivat.
5. Siguron ruajtjen, mirëmbajtjen dhe administrimin e dokumentacionit zyrtar, duke garantuar integritetin, konfidencialitetin dhe aksesin e kontrolluar në dokumentacion, sipas përcaktimeve ligjore dhe rregullave të brendshme të institucionit.
6. Ndjek afatet e ruajtjes së dokumentacionit dhe përgatit dokumentacionin përkatës për dorëzimin, transferimin apo asgjësimin e tij, në përputhje me nomenklaturën e dokumenteve dhe legjislacionin në fuqi për arkivat.
7. Ofron informacion dhe vë në dispozicion dokumentacionin e administruar nga protokolli dhe arkiva për strukturat e institucionit, sipas kërkesave dhe autorizimeve përkatëse, si dhe kryen çdo detyrë tjetër të ngarkuar nga Drejtori i Përgjithshëm i AKT-së ose eprori i drejtpërdrejtë, brenda fushës së përgjegjësive të pozicionit.

III.  DOKUMENTACIONI I KËRKUAR

Kandidatët e interesuar paraqesin kërkesën e aplikimit pranë Zyrës së Protokollit të AKT-së, brenda afatit të shpallur, të shoqëruar me dokumentacionin e mëposhtëm:

1.   Jetëshkrim (CV) i plotësuar në gjuhën shqipe, sipas standardeve të legjislacionit shqiptar, dhe letër motivimi;

2.   Kopje e noterizuar e diplomës. Për diplomat e marra jashtë Republikës së Shqipërisë, të bashkëlidhet njehsimi nga Ministria e Arsimit;

3.   Listë notash e noterizuar;

4.   Fotokopje e librezës së punës (të gjitha faqet që vërtetojnë eksperiencën në punë);

5.   Fotokopje e letërnjoftimit (ID);

6.   Vërtetim i gjendjes shëndetësore;

7.   Vetëdeklarim i gjendjes gjyqësore / Dëshmi penaliteti;

8.   Çdo dokumentacion tjetër që vërteton trajnimet, kualifikimet, arsimin shtesë ose vlerësimet pozitive të përmendura në jetëshkrim.

 Mosparaqitja në kohë dhe e plotë e dokumentacionit sjell automatikisht skualifikimin e kandidatit.

IV.  MËNYRA DHE AFATI I APLIKIMIT

Të gjithë kandidatët e interesuar janë të lutur të paraqesin aplikimin e tyre pranë Zyrës së Protokollit të AKT-së, deri më datë 03/11/2026, ora 10:00, me objekt:

“Aplikim për pozicionin e punës: Specialist Sektorin Juridik, Burimeve Njerëzore dhe Prokurimeve pranë Drejtorisë së Financës dhe Shërbimeve Mbështetëse në Agjencinë Kombëtare të Turizmit (AKT) Kategoria e pagës: IV-2.

V.  PROCESI I VLERËSIMIT DHE PËRZGJEDHJES

1.   Pas mbylljes së afatit, Njësia e Burimeve Njerëzore verifikon dokumentacionin e dorëzuar.

2.   Kandidatët që plotësojnë kriteret e kërkuara do të njoftohen nëpërmjet e-mailit për datën dhe orën e intervistës së strukturuar me gojë.

3.   Përzgjedhja e kandidatit fitues do të bëhet nëpërmjet konkurimit me dosje dhe me intervistë të drejtpërdrejtë.

4.   Në përfundim të procesit të vlerësimit, Njësia e Burimeve Njerëzore do të njoftojë individualisht çdo kandidat në mënyrë elektronike dhe do të shpallë fituesin në faqen zyrtare të AKT-së (www.akt.gov.al).