Buzë deltës së Semanit, gjatë bregdetit Adriatik, ndodhet fshati i rrallë turistik Libofshë, i banuar sipas studiuesve që në kohërat e lashta të Neolitit. Në këtë fshat gjenden 15 kisha të bukura, katër prej të cilave gëzojnë statusin Monument Kulture, të mbrojtura nga shteti.
Kishat historike të Libofshës, me stil arkitekturor të veçantë, janë: kisha e bukur e Shën Gjergjit, në lindje të fshatit; kisha e Shën Kollit në Vanaj, e ndërtuar në 1777; kisha e Shën Mërisë, e ndërtuar në 1782, pjesë e manastirit të Kolkondasit, i ndërtuar në vitet 1814–1815 nga Ali Pashë Tepelena për nder të murgut Kozma. Në këtë manastir, pranë fshatit Kolkondas, zhvillohet çdo 24 gusht festa dhe panairi lokal i zonës. Libofshë njihet gjithashtu si fshati i shkollës së parë shqipe në Myzeqe.
E pozicionuar buzë lumit Seman, Libofshë mbart edhe potencial për turizmin bregdetar. Vija bregdetare e Adriatikut që kalon pranë këtij fshati shtrihet për rreth 8 km dhe ofron një kombinim të veçantë natyre dhe relaksi. Përveç lumit Seman, përgjatë saj gjenden plazhe të këndshme, ku veçohet plazhi i Ndërnenasit, i cili ofron mundësi për pushime dhe aktivitete bregdetare.
Vizitorët që vizitojnë Libofshën, përveç eksplorimit të natyrës dhe kulturës, mund të shijojnë edhe ushqimin tradicional bio të fshatit, duke përjetuar kështu një eksperiencë autentike dhe të pasur me shije.
