Pylli i Zvërnecit ndodhet në zonën lagunore të Nartës, rreth 15 km nga qyteti i Vlorës, dhe përbën një nga ekosistemet bregdetare më të rëndësishme të Shqipërisë. Ai shtrihet në një gadishull të ulët me rërë e toka aluvionale, i rrethuar nga Liqeni i Nartës dhe nga Lagunat e Zvërnecit, duke krijuar një mjedis të rrallë ku ndërthuren pylli, laguna dhe deti.
Pylli është kryesisht me pisha halore mesdhetare, si dhe me bimësi tipike dunash bregdetare, që shërben si strehë për shumë shpendë ujorë dhe specie të mbrojtura.
Zona është e vizitueshme gjatë gjithë vitit dhe është shumë e preferuar nga turistët që ndalojnë për të parë Manastirin e Zvërnecit, të vendosur mbi një ishull të vogël brenda lagunës, të lidhur me tokën nga një urë druri mbi 270 metra e gjatë.
Pylli i Zvërnecit është shpallur Monument Natyror për vlerat dendrologjike, ekologjike dhe peizazhore, si pjesë e kompleksit natyror të Lagunes së Nartës, një nga zonat më të rëndësishme të biodiversitetit bregdetar në Shqipëri. Ai ka rëndësi të veçantë për ruajtjen e ekuilibrit klimatik lokal dhe për turizmin natyror, kulturor dhe rekreativ në qarkun e Vlorës
