Kanionet e Nivicës ndodhen në zonën malore të Kurveleshit, rreth 20 km nga Tepelena dhe përbëjnë një nga mrekullitë më spektakolare të natyrës shqiptare. Të krijuara nga erozioni i lumit të Shushicës, kanionet kanë gjatësi rreth 8 kilometra dhe thellësi që në disa pika arrin 200 metra, duke krijuar një peizazh të fuqishëm e dramatik.
Shkëmbinjtë e thepisur gëlqerorë, shpella të vogla, ujëvara sezonale dhe rrjedha e ngushtë e lumit formojnë një mjedis të egër e të paprekur, ideal për alpinistë, eksplorues dhe dashamirës të turizmit aventuror.
Nga lartësitë e fshatit Nivicë, vizitorët mund të shijojnë pamje panoramike mbi kanionet dhe luginat përreth, ndërsa rrugët e reja malore po e bëjnë zonën gjithnjë e më të aksesueshme për turizëm natyror.
Kanionet e Nivicës janë shpallur Monument Natyror për vlerat e tyre gjeomorfologjike, hidrologjike dhe estetike. Ato përfaqësojnë një peizazh unik karstik, që dëshmon proceset natyrore të formimit të relievit malor të Shqipërisë së Jugut.
Ky kompleks natyror është një nga pikat më të rëndësishme të turizmit të qëndrueshëm dhe aventuror në Shqipëri, duke tërhequr gjithnjë e më shumë vizitorë vendas e të huaj për hiking, , fotografi natyre dhe eksplorim gjeologjik.
