Shkodra, një nga qytetet më të vjetra të Shqipërisë, ndodhet në veriperëndim të vendit, pranë Liqenit të Shkodrës, një nga liqenet më të mëdha në rajon si dhe rrjedhave të lumenjve Buna, Drin dhe Kir. Rrethinat e saj ofrojnë një panoramë drejt Alpeve të Veriut, duke e bërë qytetin një ndër destinacionet më të rëndësishme për natyrë, kulturë dhe histori.
Kalaja e Rozafës, e ngritur mbi një kodër strategjike, është simboli më i njohur i qytetit dhe ofron pamje mbresëlënëse mbi liqenin dhe gjithë zonën përreth. Shkodra është gjithashtu shtëpia e disa institucioneve të rëndësishme kulturore, ndër të cilat spikat Muzeu Kombëtar i Fotografisë “Marubi”, një prej muzeve më të rëndësishëm të fotografisë në rajon, që ruan dhe ekspozon një trashëgimi unike të artit fotografik shqiptar.
Përveç tij, qyteti përfshin edhe Muzeun Historik, monumente të trashëgimisë fetare si Xhamia e Plumbit dhe disa kisha karakteristike, të cilat dëshmojnë shtresimet kulturore dhe historike të Shkodrës ndër shekuj. Qendrat historike, rrugica tradicionale dhe arkitektura karakteristike, ruajnë atmosferën autentike të qytetit.
Jeta kulturore e Shkodrës është e gjallë gjatë gjithë vitit, me aktivitete artistike, ekspozita, koncerte dhe ngjarje që promovojnë traditën dhe muzikën qytetare shkodrane.
Rrethinat e qytetit janë të pasura me bukuri natyrore. Liqeni i Shkodrës ofron mundësi për sporte ujore, shëtitje me varkë, vëzhgim faune dhe peshkim. Shkodra shërben gjithashtu si pikënisje ideale për të vizituar destinacione të njohura malore si Thethi, Vermoshi dhe fshatra të tjerë alpinë, ku vizitorët mund të përjetojnë traditat lokale dhe mikpritjen karakteristike të zonës.
Me ndërthurjen e historisë së pasur, kulturës së gjallë dhe peisazheve të mrekullueshme, Shkodra mbetet një nga destinacionet më të rëndësishme të turizmit shqiptar.
