Kryeministri Edi Rama ka njoftuar shifrën zyrtare të vizitorëve të huaj që zgjodhën Shqipërinë në vitin 2024. Janë plotë 11,7 milionë vizitorë të huaj ose 15.2% më shumë se viti 2023.

Në një postim të përbashkët me Ministren e Turizmit dhe Mjedisit, Mirela Kumbaro, Kreu i Qeverisë shprehet se kjo e bën vitin 2024 një tjetër vit rekord dhe dëshmon se Shqipëria nuk është thjesht kuriozitet i momentit, por ka shtruar për së mbari rrugën e saj në rritjen e qëndrueshme në shifra, në krijimin e një oferte serioze e të diversifikuar, si dhe ofrimin e përvojave unike në të gjitha shijet dhe ndjesitë e saj.

“Konsolidimi i tregjeve të Evropës Perëndimore si Italia, Gjermania, Franca, Spanja apo Britania, përveç rritjeve nga vendet e rajonit dhe afrimi i vizitorëve nga tregjet e largëta aziatike dhe amerikane, shoqëruar me impaktin e jashtëzakonshëm në ekonomi siç janë 3,8 miliardë euro të gjeneruara nga turizmi vetëm në 9 muajt e vitit 2024 apo rritja e standardeve të strukturave akomoduese janë treguesit më të mirë të vizionit që po bëhet realitet, promovimit prestigjoz dhe eksperiencave të mira të krijuara vit pas viti”, shkruan Kryeministri Rama.

Shifrat e publikuara tregojnë se vetëm në muajin dhjetor, në vendin tonë erdhën 654 mijë vizitorë të huaj ose 6.1% më shumë krahasuar me vitin 2023.