Tur 3 ditor Tiranë – Tepelenë – Sarandë – Gjirokastër

Tiranë – Tepelenë – Kurvelesh

Mbërritja në Aeroportin Ndërkombëtar të Tiranës “Nënë Tereza”.
Pas mbërritjes, merrni një makinë me qira nga operatorët e shumtë që ndodhen pranë aeroportit.

Më pas niseni drejt qytetit jugor të Tepelenës. Udhëtimi zgjat rreth 2 – 2.5 orë. Gjatë rrugës mund të ndaloni për një kafe “take & go” ose të pushoni në një nga baret e shumta që ndodhen përgjatë itinerarit.

Në hyrje të qytetit të Tepelenës, ju sugjerojmë të ndaloni në një nga lokalet me gatime tradicionale, si p.sh. Oda e Hasan Beut, për të shijuar një drekë që ju ndihmon të njiheni më nga afër me kulinarinë karakteristike të zonës.

Pas drekës, vazhdoni drejt brendësisë së qytetit. Që në hyrje do të përballeni me bustin e një prej figurave më të shquara shqiptare dhe botërore, Ali Pashë Tepelena. Duke ecur më tej, do të arrini në sheshin kryesor të qytetit, i quajtur Sheshi “Lord Byron”, në nder të poetit të famshëm anglez që vizitoi Tepelenën në vitin 1809.

Ngjitur me sheshin ndodhet Kalaja e Ali Pashë Tepelenës, një nga rezidencat kryesore të tij. Prej andej mund të shijoni pamjen e Luginës së Vjosës, pjesë e lumit Vjosa – lumi i fundit i egër i Europës.

Më pas, ju sugjerojmë të merrni rrugën drejt zonës së Kurveleshit, e përbërë nga disa fshatra tipikë malorë si Nivicë, Progonat, Bençë, etj., ku do të gjeni akomodim në një nga guesthouse-t e shumta të zonës.

Gjatë rrugës do të hasni Kanionet e Nivicës, që ofrojnë pamje mbresëlënëse, si dhe Ujëvarën e Peshturës, e cila ndodhet shumë pranë fshatit Nivicë.

Pas eksplorimit të zonës dhe njohjes me traditat vendase, është koha për t’u akomoduar dhe për të shijuar një darkë me ushqime tradicionale.

Kurvelesh – Sarandë

Mëngjesi i ditës së dytë ju gjen duke u zgjuar në një natyrë të pastër dhe të freskët, e cila ju mbush me energji. Pas shijimit të një mëngjesi tipik të Labërisë, niseni drejt destinacionit të radhës – qytetit të Sarandës.

Ndryshe nga rrugët e tjera që të çojnë në Sarandë që ju ofrojn pamje te Rivierës Shqiptare kjo rrugë ju ofron mundësinë të shijoni pamje madhështore malore . Udhëtimi zgjat rreth 40 minuta.

Sapo të mbërrini në Sarandë, do të përballeni me pamje mbresëlënëse të detit Jon. Mund të vizitoni një nga restorantet e shumta të qytetit; ju sugjerojmë veçanërisht Kalanë e Lëkurësit, e cila ofron një kombinim perfekt të gatimeve tradicionale, historisë dhe një pamjeje spektakolare mbi qytetin dhe detin Jon .

Pas kësaj, akomodohuni në një nga hotelet e Sarandës dhe më pas shijoni plazhet e mrekullueshme të qytetit. Mund të bëni një shëtitje buzë detit në shëtitoren e Sarandës, e mbushur me bare, restorante dhe dyqane të vogla artizanale, ose të vizitoni qendrat historike të zonës si Butrinti, qyteti i vjetër i Onhezmit, etj.

Sarandë – Syri i Kaltër – Gjirokastër

Dita e tretë nis buzë detit, duke shijuar kafen dhe mëngjesin pranë detit Jon.

Më pas, niseni drejt destinacionit të radhës – qytetit të Gjirokastrës. Gjatë rrugës, ndalesë e detyrueshme është Syri i Kaltër, një nga perlat e bukurisë shqiptare.

Syri i Kaltër është një burim natyror që vjen nga thellësia e tokës dhe karakterizohet nga ngjyra e tij blu e kristaltë, prej së cilës ka marrë edhe emrin. Zona ofron mundësi për t’u lidhur me natyrën, për ta eksploruar, për t’u zhytur në ujërat e ftohta dhe të kristalta, si dhe për të shijuar një drekë të këndshme mes natyrës.

Pas vizitës në Syrin e Kaltër, vazhdoni udhëtimin drejt qytetit të gurtë – Gjirokastrës. Me hyrjen në qytet, do të vini re shtëpitë karakteristike me çati guri. Pazari i Vjetër i Gjirokastrës është një udhëtim në kohë, ku mund të prekni nga afër arkitekturën tradicionale gjirokastrite.

Rrugët me kalldrëm ju çojnë drejt Kalase së Gjirokastrës, e cila ofron histori të pasur dhe një pamje mahnitëse mbi qytet dhe Luginën e Drinos.

Pas eksplorimit historik, është koha të shijoni ushqimet tradicionale gjirokastrite dhe të akomodoheni në një nga hotelet e qytetit.

Të nesërmen në mëngjes, nisja drejt Aeroportit Ndërkombëtar të Tiranës “Nënë Tereza”