Tur 2- ditor Tiranë-Gramsh-Belsh-Berat

Ky tur dyditor ofron mundësinë për të eksploruar disa nga atraksionet më përfaqësuese natyrore, kulturore dhe historike të zonës së Gramshit, duke ndërthurur përvoja në natyrë, trashëgimi kulturore dhe produkte lokale.

Gjatë fundjavës do të vizitohen disa nga atraksionet turistike që ofron Bashkia Gramsh, duke nisur me Kanionin e Holtës, i formuar nga gërryerja e lumit Holta. Kanioni shtrihet në një gjatësi prej rreth 3 km, me shpate që arrijnë lartësinë 100–150 metra, ndërsa thellësia e ujit varion nga 2–3 metra. Në këtë zonë gjenden shpella dhe gropa karstike me ujëra termale, të cilat përbëjnë vlera të veçanta natyrore.

Një tjetër atraksion është Ujëvara e Sotirës, e cila përfaqëson një destinacion tërheqës jo vetëm për studiues dhe gjeografë, por edhe për vizitorët që kërkojnë qetësi dhe relaks. Gjatë vizitës, keni mundësi të shijoni ambiente të përshtatshme për aktivitete në natyrë, si kamping dhe piknik, në zonën e gjelbëruar mbi ujëvarë. Ujëvara buron nga Mali i Tomorrit dhe ndodhet rreth 16 km larg qytetit të Gramshit.

Gjatë vizitës në zonën e Lenies, një nga fshatrat më të frekuentuar nga turistët vitet e fundit, keni mundësi të vizitoni Liqenin e Zi, një liqen akullnajor me ujëra kurative, i ndodhur në një lartësi prej 1,634 metrash mbi nivelin e detit, i njohur për vetitë e tij terapeutike. Po ashtu, keni mundësi të eksploroni kishat dhe urat me harqe të Grabovës së Sipërme, të ndërtuara në shekullin XVIII, të cilat ndodhen rreth 44 km nga Gramshi, në një lartësi prej 1,250 metrash mbi nivelin e detit. Kjo zonë ka qenë e banuar që në periudhën romake dhe bizantine dhe njihet veçanërisht për zhvillimin e saj gjatë shekujve XIV–XVII.

Zona karakterizohet nga bukuri natyrore, trashëgimi kulturore, rrugica me kalldrëm dhe çezma të vjetra. Gjatë vizitës, keni gjithashtu mundësi të njiheni me produktet lokale përmes një ndalese në një Biofermë, ku ofrohen produkte organike të zonës, pranë Liqenit të Lisit, i njohur edhe si Liqeni i Zambakëve. Në disa fshatra të Gramshit gjenden edhe zona të mbjella me livando, të favorizuara nga kushtet klimatike.

Dita do të nisë me një vizitë të shkurtër në Liqenin e Belshit, qytet që surprizon me vlerat e tij historike dhe arkeologjike. Në afërsi ndodhet një nga vendbanimet më të hershme antike, vendbanimi ilir i Gradishtës, i cili daton që nga Epoka e Mesme e Bronzit. Në shekullin IV p.e.s. Gradishta ishte një qendër urbane, ndërsa në shekullin III p.e.s. u shndërrua në një qytet të fortifikuar të fisit parthin. Ish-depot e ushtrisë në Seferan janë transformuar sot në një galeri arti, e hapur për publikun dhe e kthyer në një destinacion kulturor për vizitorët e Belshit.

Për të thelluar njohjen me historinë, do të vizitojmë më pas të gjitha atraksionet kryesore turistike që ofron Berati. Kalaja, siç njihet nga banorët vendas, është ndërtuar mbi një kodër shkëmbore me formë trekëndore. Ansambli muzeal i lagjes Mangalem shtrihet në formë gjysmëhëne në anët jugore dhe lindore të kodrës së kalasë.

Ura e Goricës është një nga monumentet më të rëndësishme kulturore dhe arkitekturore të Beratit, si dhe një nga simbolet e qytetit. Ajo u ndërtua në vitin 1780 dhe më vonë u rindërtua në formën që ka sot. Qyteti ka gjithashtu një numër të konsiderueshëm kishash të periudhës bizantine, si edhe hapësira të dedikuara për artizanatin dhe zejet tradicionale. Arkitektura mbresëlënëse e Beratit është unike; muret e shtëpive janë ndërtuar me gurë të gdhendur që shkëlqejnë nga bardhësia e gëlqeres. Kalaja është një nga monumentet më të bukura dhe më të rëndësishme të historisë dhe kulturës shqiptare. Ajo ka qenë një vendbanim urban që në shekujt VII–V p.e.s. dhe, si një pikë strategjike e rëndësishme, u shndërrua në një qytet të fortifikuar me mure që shtrihen deri në 1,400 metra.

Më pas do të vizitojmë Muzeun Etnografik, i cili ka një koleksion të pasur prej rreth 1,300 objektesh, dëshmi e rëndësishme e kulturës dhe traditës së pasur të zonës së Beratit. Në pjesën e hapur të muzeut ekspozohen zeje dhe punime që realizoheshin brenda familjes për përdorim shtëpiak. Kjo hapësirë lidhet drejtpërdrejt me pusin dhe oborrin, ku ekspozohen gdhendje në gur dhe qeramikë. Në katin e sipërm, në ambientet e banimit, paraqitet mënyra e jetesës, organizimi, traditat dhe zakonet e një familjeje qytetare të pasur në Mesjetën e Vonë.

Akomodimi do të realizohet në një nga shtëpitë tradicionale të Beratit, të cilat mirëpresin turistët dhe ofrojnë një përvojë autentike qëndrimi.